商店介紹

我哋牌子點解叫做「兩盒Thx」

新年嘅時候,見到大家因為肺炎冇口罩要四圍撲。 有人為咗偷兩盒口罩打爛車窗,有市民為咗撲口罩大排長龍,喺銅鑼灣、旺角鬧市跌到街頭,爭啲出意外。而啲長者殘疾人士,就因為送飯員冇口罩要捱餓。 一個政府不負責任,而令到廣大嘅香港人要受呢啲苦,當時真係覺得好嬲!點解咁簡單咁基本嘅嘢,都要搞到香港咁?!點解香港人要嘅嘢係咁簡單,應承咗都可以冇?!

於是小編就同幾個朋友一齊夾錢,去買口罩。諗住送俾有需要嘅人,結果就不斷遇到「訂單被取消!」然後每一個page,只有防疫用品,大家都會見到萬人空巷、一致跟機、無限個「兩盒Thx🙏🏻」既留言。 呢個壯觀嘅場景,既見證香港人互相扶持嘅精神,亦都見到香港人嗰種無奈。好簡單嘅嘢,爭取、失敗、再爭取、再失敗,但係大家都仍然堅持落去,點解?因為大家緊張嘅唔係淨係自己,而係為大局,為咗身邊嘅人而逼自己去經歷呢啲苦澀。「兩盒thx」,齊心得來好苦澀,好「香港」。

於是小編就忍唔住同幾個朋友,忽發奇想去搞一條自己完全唔認識點樣做嘅生產線。當時覺得,呢件係全香港人嘅事,只要能夠幫到少少,我哋都願意去努力,實行人民自救。 二月開始嘅事,大半年來披荊斬棘、俾人呃、被機器蝦,又好怕自己生產出嚟嘅產品質素唔好,深覺寸步難行。都試過唔止一次想放棄,會問自己到底為咗啲乜嘢堅持落去呢......

但係我哋真係唔甘心!時代艱難,唔甘心香港人要受呢啲苦。所以我哋希望自己能夠整到好嘅產品出嚟,深信只要毋忘初衷,我哋做嘅嘢,所付出嘅一切,一定會有價值! 半年來團隊入邊所有人,都非常煎熬,有人要返兩更工、有人要出盡所有朋友人幫手做包裝,個個都幾乎賣命。但係最終生到高水準既產品出黎,能夠幫到大家,真係個個都開心到彈起! 咁耐以黎,香港人從來都係靠自己,由乜都冇,到有機器、有材料、有無塵間、有合作夥伴、售賣同派發渠道,每一樣野都好困難,但係只要我哋唔放棄,總係有解決嘅方法。

依家興問人一切係愛定係責任,我好肯定咁話俾大家知,係因為我哋係香港人呀!呢種刻苦同堅持,係香港精神!我知道看似好簡單嘅嘢,要推動爭取其實好困難,但係我相信,香港人做得到!